കഴിഞ്ഞ കുറച്ച് വർഷങ്ങളായി നിങ്ങൾ 'ഡീമാറ്റ് അക്കൗണ്ട്' എന്ന വാക്ക് പതിവായി കേട്ടിട്ടുണ്ടാകും. എന്താണ് ഡീമാറ്റ് അക്കൗണ്ട് എന്ന് നിങ്ങൾ എപ്പോഴെങ്കിലും ചിന്തിച്ചിട്ടുണ്ടോ. എങ്കില്‍ അതിനുള്ള ഉത്തരമാണ് ഈ കുറിപ്പ്.

ഡീമാറ്റ് അക്കൗണ്ട് എന്നത് ഡീമറ്റീരിയലൈസേഷൻ അക്കൗണ്ട് എന്ന പദത്തിന്‍റെ ചുരുക്ക രൂപമാണ്.നിങ്ങളുടെ ഷെയർ സർട്ടിഫിക്കറ്റുകളും,ഇലക്ട്രോണിക് ഫോർമാറ്റിൽ സൂക്ഷിച്ചിരിക്കുന്ന മറ്റ് സെക്യൂരിറ്റികൾളും സൂക്ഷിക്കുന്നതിന് ബാങ്ക് അക്കൗണ്ട് പോലെയുള്ള അക്കൗണ്ടാണ് ഡീമാറ്റ് അക്കൗണ്ട്.

ബാങ്ക് അക്കൗണ്ടില്‍ പണം സൂക്ഷിക്കുമ്പോള്‍ ഡീമാറ്റ് അക്കൗണ്ടില്‍ ഷെയര്‍ സര്‍ട്ടിഫിക്കറ്റുകളും മറ്റ് സെക്യൂരിറ്റികളും സൂക്ഷിക്കുന്നു എന്ന് മാത്രം.

ഡീമാറ്റ് അക്കൗണ്ട്, ഷെയറുകൾ, ബോണ്ടുകൾ, ഗവൺമെന്‍റ് സെക്യൂരിറ്റികൾ, മ്യൂച്വൽ ഫണ്ടുകൾ, ഇൻഷുറൻസ്, ഇടിഎഫുകൾ തുടങ്ങിയ നിക്ഷേപങ്ങൾ കൈവശം വയ്ക്കുന്നത് കൂടുതല്‍ എളുപ്പമാക്കുന്നു.

പേപ്പർ ഷെയറുകളും അനുബന്ധ രേഖകളും കൈകാര്യം ചെയ്യുന്നതിനും പരിപാലിക്കുന്നതിനുമുള്ള ബുദ്ധിമുട്ടുകൾ പരമാവധി കുറക്കുന്നു.

ഇന്ന് നിങ്ങൾക്ക് സ്റ്റോക്ക് മാർക്കറ്റിലോ (NSE & BSE) മറ്റ് സെക്യൂരിറ്റികളിലോ വ്യാപാരം/നിക്ഷേപം നടത്തണമെങ്കിൽ, ഒരു ഡീമാറ്റ് അക്കൗണ്ട് ഉണ്ടായിരിക്കേണ്ടത് നിര്‍ബന്ധമാണ്.

നിങ്ങൾ നടത്തുന്ന ഓഹരി വ്യാപാരങ്ങളുടെയും ഇടപാടുകളുടെയും ഇലക്ട്രോണിക് സെറ്റിൽമെന്‍റുകള്‍ക്ക് നിങ്ങളുടെ ഡീമാറ്റ് അക്കൗണ്ട് നമ്പർ നിർബന്ധമാണ്.

ഡീമാറ്റ് അക്കൗണ്ട് എങ്ങനെ തുടങ്ങാം

ഡീമാറ്റ് അക്കൗണ്ട് എന്താണെന്ന് ഇപ്പോൾ നിങ്ങൾക്ക് മനസിലായിട്ടുണ്ടാവും. ഇനി അത് എങ്ങനെ തുടങ്ങാം എന്ന് നോക്കാം. നിങ്ങൾ ഒരു ഡീമാറ്റ് അക്കൗണ്ട് തുടങ്ങാന്‍ ആഗ്രഹിക്കുന്നു എങ്കില്‍, നാഷണൽ സെക്യൂരിറ്റീസ് ഡിപ്പോസിറ്ററി ലിമിറ്റഡ് (NSDL) അല്ലെങ്കിൽ സെൻട്രൽ ഡെപ്പോസിറ്ററി സർവീസസ് ലിമിറ്റഡ് (CSDL) പോലെയുള്ള ഒരു സെൻട്രൽ ഡിപ്പോസിറ്ററിയെയാണ് സമീപിക്കേണ്ടത്.

എന്നാല്‍ ഒരാള്‍ക്ക് നേരിട്ട് സെൻട്രൽ ഡിപ്പോസിറ്ററിയില്‍ അക്കൗണ്ട് തുടങ്ങാന്‍ കഴിയില്ല . ഇതിനായി ഈ ഡിപ്പോസിറ്ററികൾ തങ്ങൾക്കും നിക്ഷേപകർക്കും ഇടയിൽ ഇടനിലക്കാരായി പ്രവർത്തിക്കുന്ന ഡിപ്പോസിറ്ററി പാർട്ടിസിപ്പന്‍റ്സ് (ഡിപി) എന്ന ഏജന്‍റുമാരെ നിയമിക്കുന്നു.

ആരാണ് ഡിപ്പോസിറ്ററി പാർട്ടിസിപ്പന്‍റ്സ്

ഡിപ്പോസിറ്ററി പാർട്ടിസിപ്പന്‍റ്സ് (ഡിപി) ഒരു ധനകാര്യ സ്ഥാപനമോ എല്ലെങ്കില്‍ ഒരു ബാങ്കോ ആകാം.ഉദാഹരണത്തിന്, സ്റ്റേറ്റ് ബാങ്ക് ഓഫ് ഇന്ത്യ ,HDFC ബാങ്ക്,തുടങ്ങിയ ബാങ്കിങ് സ്ഥാപനങ്ങളും, സീറോദ, അപ്സ്റ്റോക്ക് തുടങ്ങിയ ഡിസ്ക്കൗണ്ട് ബ്രോക്കര്‍മാരും ഒരു DP ആണ്

ഇത്തരം ബാങ്കുകളെയോ,സ്റ്റോക്ക് ബ്രോക്കര്‍മാരെയോ സമീപിച്ച് നിങ്ങൾക്ക് ഒരു ഡീമാറ്റ് അക്കൗണ്ട് തുടങ്ങാവുന്നതാണ്. സ്റ്റോക്ക് ബ്രോക്കർമാരും ധനകാര്യ സ്ഥാപനങ്ങളും ഡിപികളാണ്, നിങ്ങൾക്ക് അവിടെയും ഒരു ഡീമാറ്റ് അക്കൗണ്ട് തുറക്കാനും കഴിയും.

ഒരു ബാങ്ക് അക്കൗണ്ടിൽ പണം കൈവശം വയ്ക്കുന്നത് പോലെ തന്നെ , ഇന്‍റര്‍നെറ്റ് കണക്ഷനും ഒരു ലാപ്‌ടോപ്പോ അല്ലെങ്കിൽ സ്‌മാർട്ട് ഫോണോ, ഉപയോഗിച്ച് എളുപ്പത്തിൽ കൈകാര്യം ചെയ്യാവുന്ന തരത്തില്‍ ഒരു ഇലക്ട്രോണിക് രൂപത്തിൽ നിങ്ങളുടെ നിക്ഷേപം ഡീമാറ്റ് അക്കൗണ്ട് സൂക്ഷിക്കുന്നു.

അക്കൗണ്ട് കൈകാര്യം ചെയ്യാൻ നിങ്ങളുടെ കൈവശം ലോഗിൻ ഐഡിയും പാസ്‌വേഡും ഉണ്ടായാല്‍ മാത്രം മതി. എന്നിരുന്നാലും, ഒരു ബാങ്ക് അക്കൗണ്ടിൽ നിന്ന് വ്യത്യസ്തമായി, നിങ്ങളുടെ ഡീമാറ്റ് അക്കൗണ്ടിന് ഏതെങ്കിലും തരത്തിലുള്ള 'മിനിമം ബാലൻസ്' ഉണ്ടായിരിക്കണമെന്നില്ല.

ട്രേഡിംഗ് അക്കൗണ്ടുകൾ

ഒരു ഡീമാറ്റ് അക്കൗണ്ടിനൊപ്പം സാധാരണയായി ഒരു ട്രേഡിംഗ് അക്കൗണ്ട് ഉണ്ടായിരിക്കും, അത് ഓഹരി വിപണിയിൽ ഓഹരികൾ വാങ്ങുന്നതിനും വിൽക്കുന്നതിനും ആവശ്യമാണ്.

ചിലപ്പോൾ, ആളുകൾക്ക് ഡീമാറ്റ് അക്കൗണ്ടും , ട്രേഡിംഗ് അക്കൗണ്ടും തമ്മില്‍ മാറി പോകാറുണ്ട്. അവ രണ്ടും ഒരേപോലെയല്ല. ഒരു ഡീമാറ്റ് അക്കൗണ്ടിൽ നിങ്ങളുടെ പേരിലുള്ള ഷെയറുകളുടെയും മറ്റ് സെക്യൂരിറ്റികളുടെയും വിശദാംശങ്ങൾ അടങ്ങിയിരിക്കുന്നു. ട്രേഡിംഗ് അക്കൗണ്ട് ഓഹരികള്‍ കൈമാറ്റം ചെയ്യാനുള്ളതാണ്.

അതായത് ഡീമാറ്റ് അക്കൗണ്ടുകള്‍ നിങ്ങളുടെ ഓഹരികളും ഇ.ടി.എഫുകളും സൂക്ഷിക്കുന്നതിനും, ട്രേഡിംഗ് അക്കൗണ്ട് നിങ്ങളുടെ ഡീമാറ്റ് അക്കൗണ്ടുകളില്‍ സൂക്ഷിച്ചിരിക്കുന്ന ഓഹരികൾ വാങ്ങുന്നതിനും വിൽക്കുന്നതിനുമായുള്ള ഒരു ഡിജിറ്റല്‍ പ്ലാറ്റ്ഫോമുമാണ്.

പല ബാങ്കുകളും ബ്രോക്കർമാരും ഓൺലൈൻ ട്രേഡിംഗ് സൗകര്യങ്ങളുള്ള ട്രേഡിംഗ് അക്കൗണ്ടുകൾ നല്‍കി വരുന്നുണ്ട് , ഇത് സാധാരണ നിക്ഷേപകർക്ക് ഓഹരി വിപണിയിൽ പങ്കെടുക്കുന്നത് എളുപ്പമാക്കുന്നു.

Documents required to Open demat Account

തിരിച്ചറിയൽ രേഖ

പാൻ കാർഡ്
യുഐഡി (ആധാർ)
ഡ്രൈവിംഗ് ലൈസൻസ്
പാസ്പോർട്ട്
വോട്ടർ ഐഡന്‍റിറ്റി കാർഡ്
NREGA ജോബ് കാർഡ്
കേന്ദ്ര സർക്കാർ അംഗീകരിച്ച ഏതെങ്കിലും രേഖ

വിലാസം തെളിയിക്കുന്ന രേഖകള്‍
അവസാനമായി, നിങ്ങൾ ഇന്ത്യയിലെ വിലാസം തെളിയിക്കുന്ന ഒരു രേഖ സമർപ്പിക്കേണ്ടതുണ്ട്.അവ ഏതെല്ലാമാണെന്ന് നോക്കാം
- പാസ്പോർട്ട്
- യുഐഡി (ആധാർ)
- വോട്ടർ ഐഡന്റിറ്റി കാർഡ്
- ഡ്രൈവിംഗ് ലൈസൻസ്
- NREGA ജോബ് കാർഡ്
- ഇലക്ട്രിസിറ്റി, ടെലിഫോൺ, പോസ്റ്റ്-പെയ്ഡ് എന്നിവയിലേതെങ്കിലും രണ്ട് മാസത്തിൽ കൂടുതൽ പഴക്കമില്ലാത്ത യൂട്ടിലിറ്റി ബിൽ
- ബാങ്ക് അക്കൗണ്ട് അല്ലെങ്കിൽ പോസ്റ്റ് ഓഫീസ് സേവിംഗ്സ് ബാങ്ക് അക്കൗണ്ട് സ്റ്റേറ്റ്മെന്‍റ്.
- വിദേശ അധികാരപരിധിയിലെ സർക്കാർ വകുപ്പുകൾ നൽകുന്ന രേഖകളും ഇന്ത്യയിലെ വിദേശ എംബസിയോ മിഷനോ നൽകുന്ന കത്തും.